Alfaajo Raafiu Daara on ko Waliyyu, on  jon kasfu feenyudho jon maghaamu ko jon dewal.

Himo yewta fii wirniidhi, hollako woopataa himo okka jawle, o walla loubhe e toolodal.

Himo ayna diawle ka nder buruure o nyalla ton e dewal zikru o moobha yimbhe e waajagol.

Waliyuubhe Daara tatoobhe lollubhe indhe mun hino indhe mabbhe a maanditoto bhe danyaa bhural,

 

Umaru e Muusaa, lintoraa Lamnaau men. Yaa Alla okkan barke bhee okkaa malal!

Wano Thierno Saadu Dalen ko baharu mo bheebhataa! Iskin e on jon gande heewudhe, jon bhural!

 

Himo wallifii nooneeji defte, mi waawataa lintande on dhen fow, wonay sabu juutugol.

Kononon mi linntay seedha majje no faamiron Shukral Ilaahi ko miira mettudho faamugol.

Nusharraati ko Waaju lambhe mo jangi nden, si ko landho, on anday no nawrata laamegol.

Tasriifa men, Hissabu men, maa Nahawu men, maa Larbu men, hay gooto waawaa lintugol!

 

Wa Alliyu suufi Ko Sayykhu mawdho mo Kansa on men ko gandal ko feenyudho ruudhagol.

Maa Thierno Baakar Seeleyanke mo Leelumaa Ko Waliiyu heewudho wallifaade ko jon gebhal.

 

Wano Thierno jaawo mo Ndaama duumino jangugol, o danyi gedhalbhe bhe arti Baaba ka lontagol.

Wano Aabdul Ghudduusi, on windiino defte dhe faaidaaji mu'bin no nafa jon taskagol

 

Wano Thierno Ibraahiima Ndaama e darja mun taariikha makko no fottanaa fii moyyhugol.

Maa Thierno Yaayya Labbo, on men Iintu dhun, ko yimoowo fooludho windugol maa jangugol.

Wano Aabidurrahmaani Sombili andu on ko Waliiyu mawnudho darja dhuubhudho windugol.

On zurriyaaji mu'un ko heewubhe hagghilaaji e fahmu, moyyubhe mbaadi, feenyubhe fertagol.

 

Wano Thierno Ibrahima oo mo Buruuji men ronu mawbhe mun Waliyaadku, roni bhen moyyugol.

Alghaasimu zaawiiyu feenyudho ruudhagol, Ko o suufiyanke mo haajanooka e adunawal!

Maa Saykhu lsmaaiila nyappudho Zaawiya, on woddhitino duniyaa, o wonti e fii dewal.

Jaaroore makko no saakitii nder Fuuta fow; fii mantugol oo Annabiijo mo jon bhural.

 

Wano Thierno men Mahmuudu  oya Labe Dheppere, on hunji Wuldu, o fontaano Ka jangugol.

Wano Ghutubu Tuubaa, andu on jaakanke men ko Waliiyu mawdho malaadho feenyudho bastagol.

 

Ko wanii Karamba, on mo inde mu'un woni Alahadji Saalimu jooma gandal heewungal.

Karamoko Waalo, lintu Karamoko Maadi men wano Khayrabaa, bhenfow ko juutubhe alluwal.  

 

Sankun ko mawnudho darja bhurdho zamaanu mun gandal e Diina o hewu nasru e nazmugol.

Kula Mawnde men.feenyiino ton Alfaa Umar himo hubbhi doyhotal nordhinayngal jalbungal.

 

Thierno Alii Kula andu on men foolirii dokkal e andude Tagudho arsi, e ruudhagol

Wano saykhu men Abdurrahiimi ko Ghutubu Fuuta, mo nuuru mun hino wai wa naange e jalbugol.

 

Wano Aabidurrahmaani, Thierno Nduyeejo on jon kasfu mawdho e zurriyaaji dhi jon bhural.

Ko Gedhalbhe njeedhidho worbhe roninaa nuuru on ko bhe koode jeedhidhi fotanaadhe e jalbugol

 

Idrissa Mammadu, Billo, Mammadu dhimmo, maa Is’haagha, Mammadu Bano e Ahmadu jon gebhal.

Ko Waliiyu, Ismaaiila Timmini njeedhidho, o ronii mo nuuru e ilmu makko ka lontagol.

 

Wano Thierno Mawdho Aliiyu Bhuubha-N’Diyan hebhi gebhe mawdhe dhuudhudhe, on Waliiyu ko jon dewal.

Himo heewi wallafuyeeji moyyhudhi himmudhi, wano Durratul Labraari foolunde moyyugol.

 

Ko wanii Maghaalii dassa aadati, mantiraande Nulaadho Jooman julii e makko e duumagol).

Wano Thierno Abdullaahi Bbuubha-N'Diyan ko on hikkii e Thierno Aliiyu e duubhi ko jon bhural.

 

Wano Thierno Muktaaruu Donhol ko bhe neene gooto Bhe fow ko bhe heewubhe gande, heewubhe okkugol.

Wano Thierno Abdullaahi on ko Nduyeejo, on bhe wi'iino Haatifu ewnino mo fii ngal gebhal

 

Wano Thierno Umaru Mo Daara, Karamoko an, ko on jannimmi Ilmu e Siiru, muynumi windugol.

Himo jangi kala fannuuji hewtudhi Fuuta dhin, himo janna faamina hay si won jon mirnyagol.

 

jannii mo Thierno Aliiyu Bhuubha Ndiyan Labe o ronni mo gande e jikku moyyho e faamugol.

Wano Thierno men Mahmuudu Ngeriyanke ko jon Barkeeji, danyudho gedhalbhe hattubhe feewugol.

 

Wa siriifu Sagale nde feenyunoo Waliyaaku mun Fow nootoyii mo o fewni yimbhe ka Waajagol.

On walli fewnude Fuuta beru ko o wuri ko,n mo o tinndi woo fewnay dhatal nangay dewal.

 

Wano Thierno Ibrahiima Jaari ko on wadhaa Almaami Masjidi Jaari jokkudho ruudhagol

Wa Siriifu Mukhtaaruu mo Kula, on fow no andiri on waliyaagal e gandal timmugal.

Portoohhe nanguno on siriifu, bhe naadi mo kaso mabbhe Jooman hoddiranoyi mo hettagol.

Wano Thierno Bhooyi mo Tunturun, himo jangi buy Karamoko Mohammadu Juntu okkano julnugol.

Wano Thierno Saadu Waliiyu Saatina, lintu on, maa Thierno Mamma'jan Buruuji ko jon gebhal;

Maa Thierno Mammadu Sellu Sombili khalduyanke, e Thierno Juhe Bamba no hattini moyyhugol.

Wano Thierno Aamadu Donde dandii yimbhe buy halkaare, fewni bhe, wallitii bhe e fii dewal.

Maa Thierno Taahiru Sempeten jon ruudhagol, ma Thierno Aamadu Kansa heewudho wirdagol.

Wano Thierno Ibraahiirna oya Kaareere men, maa Thierno jaawo ronirdho Zaawiya andugol,

Tafsiiru Baaba ko Moodi Aaghibu wondunoo fii jannugol mo eltugol mo e fewnugol.

Wano Thierno Maaliki Kan on Tooroodo dhon Alfaajo Yaayaa toddhinoo fii nyaawugol.

 

Wallafuyee Thierno Abdourahmane

---

---