Bismillaahi rahmaani rahiimi. 
Allaahumma salli alaa Muhammadin wa sallim.

Fuddhoode argol Fulbhe Fuuta ka leydi men; ko jamaanu Annabi Yemme Muusaa jon bhural.

Ko ka Leydi Misra bhe iwri kambhe e jawle mabbhe; bhe soggi has Suudaanu Misra e aynugol.

 

Nden non bhe lanthori ton, bhe saakii thendhe fow; teemeddhe duubhi ko dhon bhe hodhidi e faggagol.

Haa non Nulaadho nulaa, o ardi e Diina kan; woni fewndo Saydinaa Umar jon foolugol.

 

On imminoyi wieteedho Amru e yimbhe mun; yo bhe yiilo leydi bhe nodda yimbhe e silmugol;

Nde bhe hewti Maasina landho on jabhi Diinakan; bhe jabhaali bhen yobhinaa sagalle ka fooleqol.

 

Tuma Amru fokkitunoo no hootude atthi dhon wieteedho Ugh'bata bhiddho Yaasiri jon bhural.

On tiggi bhingel landho on; on jiidanii mo gedhalbbe nayo; bhen yaaji dhuudhi e weldigal.

 

Afo on ko Ruuribu innetee, ko o mawdho bhee Uuururbhe jon peewal e doole e gomdhugol.

Hikkii e makko Wanee, ko on woni baabiraawo Ferobbhebhen; himo jangi hittini fii dewal.

 

Bodhewal ko on woni baaba jallubhe fow; ko jon bhure hewdhe, dhuudhudho bhibbhe, heewubhe laamagol.

Soro bhee Bariibhe ko Daatu wietee, faamu dhun bhen dhon ko bhen woni lambhe Fuuta ka Almagol.

 

Bhee yimbhe nayo woni lasli Fulbhe e zurriyaa-ji mu'un; ko dhun fillaa ka defte e dow dalil.

Iwi non e zurriya mabhe, moyyhubhe wakkiliibhe jihaadi fii kaa Diina dhuudhubhe foolugol.

 

Wano Sayku Iburaahiima Nuuhu no fottanaa waliyaaku makko,ko jon haghiigha, ko jon bhural.

Alfaa Mohamma Sellu Labe, on men tawaarna e mabhe; on walloowo hewdho dewal, Diina, ko jon malal

 

Wano Thierno Samba ko leydi Bhuriyaa, on kadi ko fariijo, landho rewoowo heewudho juulugol.

Wieteedho Thierno Siree, mo Timbi e siddho mun bhen men tawaama e ndii jihaadi ka fuddhagol.

 

Kollaadhe kan ko wiaadho Alfa Amadu tuubirde Fuuta ko dhon wadhaa mo hebhii kulol.

Nee Sayku Saaliu oo Koyin men tawdoyaama e haldunoobhe no Fuuta hettiri foolugol.

 

Alfa Mohamrnadu jon Fugumbaa, lintu on, sembindho sawratu mabbhe fewndo ka fuddhagol.

Keebaali immini ngaari Diina ndi ronkataa; Alfaajo Muusaa, moose makko no jalbi sal!

 

Tuma noddindirnoo bhee, bhe haldoyi fottugol moobhoo Fugumbaa fii jihaadi e haldugol.

Nde bhe fottunoo fii urbha on no bhe fanpoyoo dundukkewal, sibhe fow bhe fidhu wontay dalil.

 

Nde bhe fow bhe fidhunoo ngal, bhe andi bhe hooloraama, bhe newnanaama jihaadi yo bhe yahu fampagol.

Nden non bhe immini thendhe fow gubaleejidhin, sanamuuji lanthaa, yifnbhe fuddhii silmugol,

 

Si bhe moobhoyii non Timbi fii subhagoll Amiiral Muuminiina moobha julbhe e fellugol.

Almaami Iburaahiima Mawdho subhaa wadhaa Almaami Fuuta e hoore Diina e fottugol.

 

O darii kisan fii ndii jihaadi, o fampoyii nogay konneli o fooli bewbhe ka fanpagol.

Almaami lontini dhon kisan bheya Taalibaa bhe jihaadi njeetato, fow si hooti e fewnugol.

 

Moni bee wadhaa laamiidho leydi ka iwrunoo. Peewal e nundhal huubhi Fuuta e hettagol.

Nden non bhe haldidi fii  ko nafqhurtee jihaadi e fii no konu moobhorta yaltana fellugol.

 

Si bhe moobhi waylubhe fow bhe yamiri bhe nangugol tafugol ndaqaaje dhe jeeli thewdhi e tookugol.

Kala nyeenyo yamiraa wallugol ko o waawi woo fii moobhugol aalaaji hittina dhabbhugol.

 

Kala taalibaabhe toraa yo hittin fii duaa fii foolugol heeferbhe yamira bhe silmugol.

Nden non mo bee hippii e golle dhe halfinaa. Aalaaji moobhaa, haldidaa fii fampagol.

 

Konu woo yahayngu si jawdi hebhoyi no martinee jowabhal ko hebhoyii kon wadhee fii fellugol.

Kala jawdi wurndi e mayndi fow mun hasboyee wattee ka Bayta I'Maali jowabhal timmugal.

 

Ko, e dhun bhe ittata thoggu putthi e thoggu pinka e thoggu thonthi, bhe sooda fow fii fellugol.

Ittee gebhal yahunoobhe konnugun fow yedhee, kala barminaabhe kisan fii nyawndagol.

 

Ko wanii bhe jokkiri haa bhe hebbini keesu Bay-ta l'Maali on ko no huutoree fii nafghuqol.

Nde koneelimoobhaa fii honoygol bombhe bhen, jaarobhe jaara si bherdhe jinyirana foolugol

 

Nden non jellibhe e worbhe awlubhe immoyo fettoo nhanaabhe, bhe manta suusubhe maayugol,  

Haa wobhe geewo, waata, antora ngorgu mun, foda teeragol heeferbhe dahira bhe foolugol.

 

lontal ka almanaaku, fottaa wonde dhun ronindirte; baaba si maayu bhidho ronay gebhal.

Haa luutondiri Soriya e Alfaayaa e fii laamuujidhin, si bhe wartindiri fii laamagol.

 

Gerre mabbbhe yketthre o tiidhi haa ittuno dubhe fow aani noddi e sulhondirgol fii gebhal.

Haldaa si fottaa Fedde bee ko yo lonto laamoo duubhi dhidhi pottoo si timmina ngal lajal.

 

Ndeya fedde kadi hebloo, bhadoo lontoo wa dhun non jokkiraa haa porto ardi e paatawol.

Nde Faransi arnoo, bonni dhun wadhi faale mun fii laamagol en, loona en, hendoo bhural.

 

Wallafuyee Thierno Abdourahmane Bah

---