Nde faransi arnoo jatti Leydi me'en wadhii Almaamiibhe e bhaawo doole e keldhugol!

Bhe darii bhe bonniti njubbhudiiji dhi mawbhe men wannoo, bhe wadhi ko lointa Fuuta ka janfagol!

 

Almaami Aalimu, on nde dhi mo o taaranaa o hedhii ko porto yamirta fottana huuwugol.

Almaami Umaru e bhiddho mun Almaami Ibraahiima Saadu ko jon yidheede ko jon bhural.

 

Almaami Baakar Daabolaa, on non ko gando rewoowo Alla, remoowo, heewudho jiidagol.

Oo qhaburu makko ko kanko jasi mo o nyappi fow himo juula janga ka ghaburu makko ka wuurugol.

 

Almaami Ibraahiima hajjuno fewndo mun, on men ko jokki ko jangugol maa juulugol.

Almaami Aaghibu Daabolaa on sakkitii, firo inde makko yonii ko andina lannugol.

 

Argol Faransi bhe tawno njubbhudi Fuuta ndin hino moyyhi hino dhoftaa no hattini feewugol ;

Si bhe lanthi dhun dhon fow bhe dhayniri en gebhoy ko no aawa lurral, senda yimbhe e fii gebhal.

 

Hooreebhe wonti e poodhodirgol haa loa. Bhe darii bhe hulbhini en bhe hadhi en gollugol!

Portoobhe udditi lekkoluuji bhe janni ton jandeeji bondhi hadhaydhi needi e pellital!

 

Jandeeji mantudhi lambhe mabbhe e mawbhe mun, aybindhi mawbhe me'en sifordhi bhe hoynugol!

Hibhe folla lambhe siforbhe yidhugol Leydi men, hibhe nanga wobbhe bhe naada kaso haa maayugol!

 

Wano landho Labe Alfaajo Yaayaa, on nabhaa riiwaa e leydi e hoore toonye e janfegol,

Nde o saltinoo dhoftaade porto e parte mun o darii o yeddi o yenni dawla Faransiwel,

 

Bhe nabhii mo kanko e bhiddho makko mo andudhaa, Alfaajo Aaghibu, thuutho heewudho okkugol,

Bhe kasaama « Port-Ettenne», ko ton Alladhu on humnoyi lajal Alfaajo Yaayaa jon bhural.

 

Haa wootudhen «NON», hettudhen ndii Leydi men, radhidhen faransi bhe moobhi pawle ka hootugol.

Alfaajo Yaayaa artiraama e Leydi men Almaami Saamori men, bhe wadhanaa feetowal!

 

Almaami Saamori on ko landho wa on hebhaaki Ka Leydi Afrik fow e suusude fellugol!

On darti Porto faransi fewndo bhe naatunoo nder Leydi men, konu makko harni bhe halkagol!

 

Ngol rindhugol men ittanii en hersa buy e moneeji buy, monibee yo soobo e gollugol...

 

Wallafuyee Thierno Abdourahmane Bah

---