Hino indhe Almaamibhe Fuuta, no fottanaa ko bhe andiraa dewal e Diina e nundhugol.

Almaami Ibraahima Nuuhu, ko on adii almaade Fuuta ; ko jon haghiigha, ko jon dalil.

 

Karamoko Alfaa Timbo Mawnde o lollirii ko waliiyu Alla, ko kanko fenhi ngal Diinawal.

On bhalno mahi juulirde Timbo; ko nden adaa bhalneede Fuuta; ko barkinaadho, ko jon malal.

 

Nde o fokkitannoo fellugol Gadha-Jaaliba, hakkile makko wilii ga fewdo ka lumbugol;

Nden Fuuta habbii duubhi tati fii ndikkugol Almaami, haa tayhoraa, bhe ebbhani lontagol.

 

On dhon ko bhii Bappaajo makko , ko on wiaa Almaami Sori Soryaa ko kanko wadhaa bhalal.

On udditii thae hewdhe Fuuta, o noddi bhen e dewal e Diina o fooli kala jon murtugol.

 

O honiino Kaarta e Waasolon, haa Kambya; noogay koneeli jihaadi oo nabhi fellugol.

Almaamiyaagal makko ngal tuma timmunoo, sappo e go'o duubhol o bhoriraa follegol.

 

Hooreebhe Timbo nde moobhodirnoo haldidi yo o jonnitoy Alfaajo Saalihu almagol.

Dhon fuuta fuddhii bonde sabu wonu fetthagol Soriyaa e Alfaayaa, bhe naati e gerdugol.

 

Alfaajo Saalihu lontinaa, ko Waliiyutun ruudhiidho, dewo Allaahu, heewudho juulugol.

Ondhon o hawkuno laamu aduna o hippanii fii juula janga e jikrugol haa ari on lajal.

 

Hippii mo tiidhudho doole; tuma nde o fooluno juulirde Timbo o sunni. (Kaawe ngal yanal !)

N'Den yimbhe fow dogi Timbo lanthori thendhe fow Alfaajo Saalihu dogi o hammiri Bantinhel.

 

Bhe wadhli ko hawnii! bhaawo bhen irtii furee , Karamoko Alfaa on bhe faalaa nattugol.
Nde bhe fuddhinoo rondaade gabhuru, bhe hulbhinaa; Si bhe fow bhe dhenyhii tun bhe atthiti rondagol.

 

Ngoo fello wongo ka dow Misiide nde ottunoo, yhettoobhe huli, dogi, nhaldhi, tertii yhettugol.

Fillaa ma wonde nde ghaburu oo on irtanoo, tiwe tholli moobhi e, dow furee fii wirnugol.

 

Dhin tholli hino andaa, ko dhin dhon wietee almaami, dhin warataake , (lskin ngal gebhal !)

Tuma artunoo Alfaajo Saalihu on yamiri kono udditoya ghadburuuji tati fii surrugol.

 

Tuma nibbhunoo goykiiji tati habbhaa; e nder kiyakin wadhaa Almaami, haldaa suudhugol.

Ghaburuujidhin tati dhin ombitaa hay gooto an­ndaa honto woni Almaami fewndo ka surrugol.

 

Iwi dhon si fokkiti aybhe goo kadi jiirugol ndii Leydi Fuuta-Jaloo, bhe jeyra ndi fellugol.

Tuma Fuuta nannoo dhun, bhe folloyi dhon kisan Alfaajo Saalihu; on no wondi e dhaatugol!

 

Almaami Sori jonnaa, felloyi on kisan; o honnino bhaawo o jonnitaama ka laamagol e almagol.

Nde o seeninoo Labe hiwragol faatunde, nyaw hebhi bhandu makko o maayi, nangaa surrugol.

 

Labe dhon o surraa, ghaburu makko no maanditaa. Allaahu warjo mo kuudhe makko ka ummutal.

Oya bhiddho makko wiaadho Saadu o wondunoo, wi'i ; « Sori ko Saadu ! » O taari sala fii almagol!  

 

Almaami Saadu sahinbinaama nde lurrunoo Soriyaa e Affiiayaa ka Timbo ka fellugol.

On dhon wadhaali jihaadi haa o sahinbimaa e gereeji Alfaayaa e makko ka fii gebhal.

 

Fillaama wonde modhoori addano wallinaa suddhaa ka nder mihiraabu makko ka nibbhugol.

Ndeo habbirannoo julde subaka, o sujji tun dhee juudhe makko fawii e mayri ka sujjugol!

 

Ka sujuudu arano o sikki wonde ko kuurawii, ka sujuudu dhimmo o tuppi modhowiingin labhal !

Bhe o julni bhen andaali oo gere makko fow, nde bhe salminoynoo yimbhe ari fii ndaarugol,

 

Fow manti thuuthal makko ngal, fow seeditii wano oo danyaaka e wakkilaare e suusugol!

Hedho lan mi haalane honno oo wardaa e nder gere mabbhe on, a taway bhe janfi mo fii gebhal.

 

Suufaajo sortu labhal mu'un ndeo hayninoo Almaami Saadu no wedditii fii fowtagol.

Nde o tuppunoo mo ka bhaawo makko o rengiti, si o itti hoore e jungo nyaamo ka hollugol!

 

Si o addi horde o tumbi dhon si o rondoyii. Tuma hayninoo Almaami Saalihu ngal koral,

Almaami faddhaa, dhiwti wulli, o wartoyii suufaajo on nde o ninsunoo fii gerdugol.

 

Baademba Abdullaahi on men lintu dhun. Almaami jon nundhal waraadho e nder dewal.

On ittu toonye o itti bonki e Fuuta men, si o fewni yimbhe e faade laawol feewungol.

 

On non ko nundhudho: sabu ko on piira missal fii nundhugol, fii okkugol, fii moyyhugol!

Soriyaa nde dartoyinoo mo, gere on satti ken si o yaari keetigiyaa, bhe wari mo e ngel thael!

 

Ko koneeli sappoo e jowi o honni, o sahinbinaa! Ya Alla yurme mo yaafodhaa rokkaa malal!

Almaami Abdul Ghaadiri hino hikki dhon, himo heewi fat-hu e wakkilaare e foolugol.

 

Tuma goddho arnoo fewndo on hippii Koyin, juulirde mabbhe o sunni, wonani mo halkagol.

Labe faaboyii bhe, radhii bhe konu on ngun reaa; hooreejo konu on ngun waraama ka hootugol.

 

Ndeya Fedde alfaayaa bhe moobhi koneeli mun bhe radhii liimaamu o hammi Telejigi nyawndagol.

On yaano Saralon, felli Falba o arti tun, Baademba sakkitoyii mo Timbo ka hewtugol.

 

On fooli Abdul jatti almaamaakugun, o radhii mo tinna o yaari Limban suudhagol.

Nde o artunoo haa Misra Timbo o daakoyii, Baademba yamiri mo woddhitaade e almagol.

 

Baademba fokkiti bhayra neebhii, Fellugol Jegelen Sudan, konu makko fow yahi fellugol;

Almaami Abdul moobhi konu mun sakkitii mo ka saare Keetigiyaa Diten fii yottagol.

 

Baademba yahi juunloyde subaha, o naati tun bheya huubhi dhon juulirde habbii yaltugol.

Nde o yaltunoo bhe radhii mo kanko bhe nangi mo bhe sahinbinii mo e takko theekehi dow dhatal.

 

Bantanhi fudhi ka o surroyaa dhon, kin no dhon; hiki wirli thaldhi e hoore ghaburu ka ley dhata.

Almaami Abdul lurri kanko e yimbhe e Alfaayaa, bhe janfitoyii mo fewndo ka haldugol.

 

Bhe subhii kisan Almaami Baakar jikuruwol. Almaami Abdul dartoyii mo ka taarugol.

Fow haldi fotti, bhe folli Abdul dhon kisan si bhe taaranoy Almaami Baakar jikuruwol.

 

Almaami Baakar hammi jegelen fellugol dhun non ko Satadugu, haa o neebhini artugol,

Almaami Abdul janfitii mo e bhaawo makko, o hetti yimbhe , hbe jonnitii mo kadi almagol.

 

Almaami Bakkar jikuru arti, o nawni tun woni mayde makko, si hetti Abdul lontagol.

Baakar gedhal Baademba thuutho nde alminoo, o wadhii jihaadi o noddi yimbhe e silmugol.

 

E zamaanu o' ngee naange wenyuno e walluhaa haa koode yaltiti, yimbhe wonti e haawagol.

E zamaanu o' kadi leyddin dimbii yeyhii haa thuudhi buy yani, yimbhe huli hay immagol.

 

Almaami Yahyaa woddhitiidho hawa hebhii Barkeeji mawdhi o janfoyaa ado faatagol.

Almaami Baakar arno Timbo, radhii mo jattiti Almamaaku o henditii ngola meetelol,

 

Hare tokkitii Soriyaabhe bhen fow moobhoyii si bhe jokkitoyi Almaami Baakar yottagol.

Nde bhe fottunoo nder Timbo dhon bhe habhiino nyal­lal fow si hebhi Almami Baakar barmugol.

 

Nde bhe ronkondirnoo fes, bhe haldi bhe fottani kala fedde laamoto duubhi dhidhi wona lontagol.

Almaami Umaru ko jon gebhal; on dartinoo Alfaa Muhammadu juhe Lamin'yaa hubbuwal.

 

On mawdho hubbu o noddu yimbhe e hawkugol Almaami Fuuta, bhe moobhondiri fii mantagol

Soriyaa e Alfaayaa bhe fottani dartagol oo murtunaydho jamaaji Fuuta e fellugol.

 

Nde bhe fottunoo o radhii bhe fow, buy lanthitii si o felli saare o naati Timbo e mantagol.

Si o daakoyii dhon lebbi dhidhi haa maydenden tawi mawdho hubbu e dhun, o juhiraa maayugol.

 

Nde o maayunoo konu makko lanthori thendhe fow, Almaami arti ka saare mun fii lontagol.

Almaami Ibraahiirna Bakkar fewndo on dhon feenyi oya mo bhe jammunoo Karamo Abal.

 

On dhon ko afo Alfaa Muhammadu juhe; ko on bhuri dartagol Almaami Fuuta e murtugol.

Almaami Ibraahiima yaltuno fellugol Kararnoko Abal e koneeli makko e nangugol.

 

Nde bhe hewtunoo Bilimaare gere on tokiitii, o warii ko dhuudhi e yimbhe mabbhe ka fellugol!

Almaami Amadu fewndho almaamaaku mun, bhurion yiaaka e wakkilaare e feewugol,

 

Almaami Ibraahiima yilili ko on yahannoo porto, ardi e mabbhe Timbo ka yottagol;

Si bhe dhayniri mo ahadiiji dhiya dhi bhe windunoo, bhe salii dhi hunnude haa bhe tabitiri janfagol.

 

Almaami Bokar Biro no wondi e dolnugol, ko o nandi woo ko nyabhii e tagudi e nyaadhugol.

On non ko on woni sakkitoro Almaami en ado porto arde, ko on bhe tawdi e meetelol.

 

Wallafuyee Thierno Abdourahmane Bah

---