Allaahu ko gooto alaa mo rewen
si wanaa On yendhudho jon goodal.

O nulii Koohoojo Muhammadu men,
yo O juulu O hisina e jon tefugol

Midho faalaa haalude seedha e piiji
ko feyyhi e duubhi nga'al harewal.

Midho haaloya men fii Fuuta sifoo
neemaaji dhi Fuuta danyirta bhural. 

Sabu, dhu hino laatoo waaju mo
wajitorii, o yiay nafa ngol yimugol.

sawtaadho si jangii dhii, sawteende
iway mo, o sakkitoroo jalugol.

Kala jon haggil tawanoodho e ndee
hare, seedii tampere ngol habhugol,

Si o taski no dhun fow feyyhiri non,
o taway Allaahu ko jon bawgal!

Itler « deklaarii »: ndee hare mun;
tawi yimbhe no nyaayha e nder beldal.

Kala on wonnoodho e haaju mu'un,
tertii dhun wonti e fii habhugol.

Itler heli sappo e jowi raayaaji,
o harnibhe hoyre e tampinegol.

Amerik e Faransi e Engele en e
Risii, Shlnuwaa woni jon polgal.

Dhi'i leyyhi nde hawtitunoo dhi dadii
sibhe nangidi ahadi e fii habhugol.

Seneralji nhanaaji subhaa subhitaa,
wano Mongomerii on wardho Romel,

Wano Istalin e Mahuu Saytun,
Rozvelt, Leklerk, ko dhimmo Degol.

Bhe habhii Itler e ngun konu mun,
bhe helii ngu, ngu sakkitorii reugol.

Bhe adii rindhinde ko Alman nangi,
bhe ruttiti leydhe ka jon jeygol.

Si bhe naati e leydi ndi Alman innori ndin,
naatande nde jon siugol!

Berlen hippaa, koe fow nangaa,
Himler wartii Itler mutugo!

Alman toonyitino! Bhe hettii njoddi
mu'un warteede e wirtoyegol.

Alman foolaa sendaa gebhe nay,
sendubhe bhen limtaa ka gimol.

Hibhe huuree ton hibhe hoynee ton,
yo bhe huure bhe hoy nee haa to daral!

Yangiiji hareeji no hattini yurmude;
nanu sifa mun hibbaa gongol!

Nguu laarnu Wishii walii toonyoobhe,
bhe lorri bhe tampini jon lougol.

Mareshaal Peten woni hoore mu'un,
on mawdho mo moyyhaa anniyagol.

Miijii fii poore e yangi mu'un,
bonnii endhan, bonnii dewgal!

Jon nagge, nge soodee, seedha mu'un
wona poore, ko lutti wadhee kafuwal!

Hara poore siwa, hara huunde alaa,
o tiwee, o piyee, o wadhee bhoggol!

Kala on mo yhawaaki e poore mu'un,
gasataa ga o juula e tumbondiral.

Si no woodi bhadiidho mo jon jaakal,
on karhee sottude ngel misigel.

Dhun dhoodhe ko seedha sifii mi dho'o,
si mi halfow, wontay gatthondiral!

Maa miijitodhaa fii Kaakulimaa.
dhon non ko jahnnama jon jaygol!

Si a yii bhen iwtubhe Kaakulimaa
ko bhe jon horagol, ko bhe jon layhugol.

Yoga mabbhe no hewtiri galle mu'un,
ko kisan tawetee no e fii maygol.

Maa miijitodhaa Senegaali
ko karhetenoo forsee fii maayygol.

Surgaajo si haalane ngurndan mun Senegaali,
a yurmete ngel musigel.

Jon jawkal windee, fii yo o ittu
O yiltoo yaadu e ngal giital.

Bhe maraabhen windee, bhen karhee
faalaadho salaade wadhee bhoggol.

Tawa feere alaa no ronkira yaade;
o dhabbhoya njoobha o nanga dhatal.

Ndar mawdho mo Fuuta no Fokkiti yaadu
ka endhan mun fii juurondiral.

Dolokal mun leppi e deftere mun
faleteende e tuggoral thalewal.

Si ko jon gandal Alluuje falaa dhe
e defte wadhaadhe e nder Sasawal.

Si ko landho subhee nayo tiidhudhe
maa dhun njeetato rondoo ngal langal.

Bhen dhon tawdaaka e bhen rondii-
bhe maker baataajo nga'al langal.

Si bhe hewtii bhen rondilbhe mo bhoosa mo,
barda mo haa bhattoo dhoygol.

Oo bhuttu moheddhen yetten Alla
ko dhun si o duumoo haa to daral.

Sabu Alla wi'iino ka Deftere mun
reenaande e bondhe e wattitugol.

<< Si tawii on yettii dokkal an,
midho bheyda mi yannyana on dokkal.>>

Si a yii laamaadho no joodhoo e galle
mu'un iwi fudhugol haa to mutal.

Aranaali mo dhon mbatulaajo wioowo
ko ngal kuugal e ko nga'al kafuwal.

A taway dhon Fuuta-Djaloo bhuttii
si dha andi ko feyyhi ga nder harewal!

Fuutanke si habbhii bhoggi mu'un
dimbordhi ga tande e ley dhowkal,

Nyallii dhon jangude kaamilu mun,
nyaamii dhon hay si ko bantarawal,

Naadii nai mun tuma hiiri,
haray timmii weltaare ga jon remugol!

Fuutanke si eggii leydi mu'un,
wota lando ko tampere eggini ngel!

Neemaaji dhi Fuuta-Djaloo rokkaa,
andaa dhin moftortaa limugol.

Si a taski ka Diina ko dhon tawataa
fuutanke no hittini fii rewugol.

A yiay Waliyaabhe bhe darja mu'un
dhuudhaa sugu mun lollirabhe e dewal

Bhe alaa haajuuji ka leydi
tana rewgol Allaahu sifordho Kamal.

Si a taski ka leydi ko dhon tawataa
neemaaji dhi moftortaa limugol.

Dhii thandhi Ilooji e jurdhe mu'un
e hawaaji mu'un jon nootitagol,

Die maddji no bhuubhiri wayta gillaasi
no laabhi no dakmani jon yarugol.

Pete madji no newdhiri wayta siman.
woni ndungu e tyeedhu alaa tayhugol.

Dhe'e leddhe rimooje e dimdhe mu'un
welnaadhe dhe moftortaa limugol!

Ndar Fuuta e kowle ko dhon tawataa
wano Fuuta alaa e labeede laral!

Maa Ngabbu ga toowiti haa darodhaa
ornaa dhon ndardhe dhe jon yiugol.

A yiay dhon piiji labaadhi yiaa
nhari aydhe e pelle dhe jon tabital!

Yo musibbhe yidhen dii leydi me'en
ndi alaa sugu mun e labeede Iaral!

Yidhugol ndii leydi ko wallitagol
kala tampudho ballal jon fugol.

Yidhugol ndii leydi ko huuwude kuudhe
dhe andi nafay kala jon hodhugol.

Yidhugol ndii leydi ko findingol
dhaaniibhe bhe seeda e ngol dhoyngol.

Yidihugol ndii leydi ko wallude bhibbhe
hebhaabhe e mayri ka fii gandal

Yidhugol ndii leydi ko darnitagol
juulirdhe labaadhe dadhooje tymal

Yidhugol ndii leydi ko wallitagol
ka'a Diina no wontira jon daragol

Ko onon yo musubbhe, si dhon faala
hettaade e rimdhude hetta bhural, 

Jangee jannon jibunaabhe mo'on
neiron bhe farilla e sunna dewal;

Jannee Ghur'aana gedhalbhe mo'on
wallon, no bhe andira kuudhe dewal.

jannee bhe faransi ko dhun si bhe an da
ko honno bhe nawrata huuwondiral.

Wota aaden aamu « depansude »
jawdi mu'un fow fii yo o  jannu gedhal.

Mono faalaa bhurnude bhiddho mu'un
yo o moyyhin needie andingol.

Ko mo jangii tun si o faamondiree
ko mo jangii tun si o feewa dhatal.

Ndi'i leydi me'en bhurtay finugol
tuma jangubhe dhuudhi, ndi hetta bhural.

Awo kaabhe e enseniyerbhe mu'un,
medesenbhe e enstititerbhe kamal,

Sugu bhee ko si dhuudhii leydi me'en
si ndi jonnee dawla ndi hetta bhural.

Midho dartoo dhoo sabu juunnude haala
no haabhina ronkina jon hedhagol.

Mi toroo jooman yo o yaafano en
faatiibhe  me'en ardiibhe bhural.

Mi toroo jooman yo O jonnitu en
ndii Leydi, O bheydana en pottal.

Mi toroo jooman yo O juulu O hisna
e Bhurdho tageefo mo jon tefugol.

Labe Nyande 1 Maarasi 1946

Wallafuyee Thierno Abdourahmane Bah

---

---