Dhii pularji, ko min Thierno Abdourahmani bun Thierno Aliou wallifii dhii, fii yewtu gol Amicale Gilbert Vieillard on, andina kala yimbhe wonubhe e mu’un ko lawol fewungol, ko wallungol yimbhe mu’un e leydi mu’un. anaa fii mi waawata arabu walliformi pular, ko fii ko pular on yimbhe fow nanata, fahma. E ko fii ko dhengal pular ngal bhuranimmi kala dhendhe. Awa hino pularji dhin:

 

Yo musibbhe an, jentee nanon, midho yewta on
fi jokkugol endhan; jabhon ko mi halata,

Nootee, wonen konu wootu, fewnen leydi men
wano mawbhe meedhen gerdunoo ko bhe sinthata!

Kala on mo nootii noddital Amicale danyay
Barkeeji buy, sabu on ko endhan jokkata!

Amicale si wuurii, dhun wonay nafa leydi men,
nafa yimbhe men, nafa julbhe fow, ko bhe sikkataa.

Amicale ko faabo ngo Allah addi e leydi men:
yo ngo faabo en faabooji moyyhi dhi hubhataa!

Amicale ko naange nge Allah fudhni e leydi men,
yo nge jalbinan en, yiitiden, en wenthataa!

Hari Fulbhe kan fii mun muulii gila duubhi hewdhi:
alaa e medhen haldeteedho ko huuwata!

Hino orniree wano muumi tun; hino dunthiree
haajuuji fow, hino jolda, yhawra, ko andataa!

Haa jooma faabori en e bawgal Makko ngal
Amicale ko nootoo inde men tuma noddita.

Kala yimbhe aduna e hewde mun, ko enen bhaleebhe
subhaa wadhaa ko huuwa, itta ko andataa.

Midho sikki non sabu dhun ko angal fottugol
defi en dhuun: koni haldiden, kala yiitida!

Yaa persidan, wonu neddho nundhudho, yiddho leydi mu’un,
e yimbhe mu’un, ko dhun tun fewnata;

Yaa mamburuubhe, wonee tamande e bhaawo oo
hooreejo moodhon, taskodhon ko o fewjata.

Bhee Fulbhe tampubhe Fuuta too, ko musibbhe men,
ko musibbhe dambe e diina fow mun, sottataa!

Koni faabodhen bhee! Anditen ko musibbhe men;
en fow wonen sadakaaji mabbhe, bhe wuurita.

Faalaadho wallude siddho mudhun ndaarataa
nafa mun, yo ndaaru nafoore bhen bhe o  wallata.

Hino yeeso men teemeddhe piiji ko fewniten
fii yimbhe men, fii leydi men dhun huubhataa,

Mo no nangi goonga yo andu yimbhe fenaande fow
ko bhe liddu makko, ko aybhe makko bhe deyyhataa!

Nde Nulaadho men nulanoo, o ardi e goonga on,
kala yimbhe mehre o tawu ko aybhe bhe dunthata,

Ha non o fooli bhe fow, o fewni malaabhe bhen;
konu makko tiidhi, o  hubbhi goonga mo rotthataa.

Amicale ko non wai: aybhe makko yo andu dey
si fenaande dartike yeeso goonga, nde bhooyataa.

Yo mi darto dhoo, sabu haala dhuudhuka haabhinay
hedhotoobhe; seedha yonay ko findina hubbhina.

Allaahumma salli ala sayyidinaa Muhammadin,
wa alaa ahlihii wa sahabihii, wa sallam!

 

Labe Nyande 15 Octoobur 1945

El Hadj Ibrahima Caba: Defte Cernoya 1998

---

---