Ferudho Makka yahi Madiina.

O felli bewbhe o fenhi diina.

O tabitiri nyaawugol siina

E jannugol wahyu on fiina

Si hooti Annabi Mahmuudu.

 

O naati Makka o fellali;

Ko hay e booboobhe wullaali.

Bhe Makka bhen yetti, bhe geraali,

Sabu bhe tawu si bhe yettaali,

Reay bhe Annabi Mahmuudu.

 

Ko hombo wawi limude koode?

Ko hombo waawi etude diide?

O lima njaareendi jeereende?

Mo waawii dhun waawataa limude

Bhuralji Ahmadu Mahmuudu.

 

Nuladho danyanaadho nayo worbhe,

Bhe fow bhe faatino ko bhe faybhe.

Yo Allah yarloyo bhen fewbhe

Mi lintanay on bhe, andon bhe,

Gedhalbhe Annabi Mahmuudu.

 

Al Qasimu afo adoraymi;

Ko Abidullaahi hikkay mi,

Ko Tayyibu labaadho wattay mi;

Ko lbrahima howiray mi

Gedhalbhe Ahmadu Mahmuudu.

 

Ko an Muhammadu fewtay mi

Ko an mi hoolori tuma may mi

Ko an hisintammi tuma tawu mi

Ka gabru an piiji dhi hulay mi

Ko an yo Ahmadu Mahmuudu.

 

Ko an mi noddirta ya Rasuulu

Ko an mi bhattorta si mi juulu

Ko an mi mantorta si mi foolu

Yo jooma me'n hisnu yo O juulu

E mo'n yo Annabi Mahmuudu.

Wallafuyee Thierno Abdourahmane

---

---