Fii Boowe

Dhee boowe kadi nafa mun no heewi mi fuddhoray
lintande on yoga maaje hay si mi lannataa.
 
Ko ka boowe yiataa doobe tiwe maa dhun yiaa
gure semba hunduko dhun no ruuga no fappita.

A yiay kelete e nyaale rawnudhe mbaadi mun
hidhe jokki gure nai soppa boonoko soppitaa.

Nai buy no weedi no nyaama ton dooyhornma on
e kudheeli ketthi bhiraadhe maji si heewitaa.

Maa thente deemu e thente gooki no jinda ton
hino huuha siika no nyaama dimdhe no honkitaa.

Ko ka boowe kadi waetee sodhorko ko sannyiree
debe hoy e bedhoy tuma theedhu yalti dhi yaltita.

Hudho tente maa buroydhi no nyappiree
nyappoodi wona thappandhe duubhi ndi bontataa.

Doyyhorma men hino nyolniree thuntuujidhin
dhun nyolniray wano jaanye nai fus seedataa.

Hino, woodi godbhe ko njandhe tun soomii e mun
dheyadhen ko fogo tun dhin ngaluuji dhi hayrataa.

Boke toodhe fetthere Leydi mabhe ko boowe tun
Ley-Maayo Telimile boowe mun ton hattataa.

Darnaama ton iziinuuji dhin hino golla ton
hidhi irta kaayhe e leddhe ngalumen yaltitaa.

Dhee boowe leydi Tugee dhee fow hidhe heewi tef,
fogo on bhe fuddhoto irtugol dhe ko neebhataa.

Si a seedi boowal Pontholon juuteendi ngal
maa yanji ngal a taway no njandhi ko hattataa.

Maa boowe Tunkurumaa e boowe Banii ko nii
Kuratongo maa Kimmaa ko Boowe fandhataa.

 

Wallafuyee Thierno Abdourahmane Bah


ALT NAME

Thierno Abdourahmane Bah