Fii iidi

Juldeede Leydi me’en ko Donkin, Suumayee ,
jombente. Dhee tati fukkataake dhe tultataa.

Donkin ko juulantee ko weltorqol ko bhee
hadjoobhe timmini hadju mabhe ka Makkataa;

Oo Suumayee sabu juulugol dhun ngol ko fii
weltaare men fii hoorugol men hooritaa

Jombente on ko hitaande heyre nde hewti wo
fow yiittiday fii salmondirgol hawtitaa.

Juldeere faandike yimbhe fow hino heblanoo
fii koltu julde e nyiiri julde bhe haabhataa.  

Tuma iidi yaltoytee mo bee bhornoo thudhoo
urnoo paroo wakko gatoy mun fokkita.

Si tabaldenden tappaama yaarudhe sukkinee
fow moobhoroo ka misiide haa tuma hawtitaa.

Si tawii ko iidi buruure giiree hammanee
ngeru moyyhinaangu ka binde saare ngu bontaa

Almaami julna o waajoro khutbaajidhin fewnaabhe
waajitoroo bhe weltora dhun fota.

Paykey no weltora hewtugol fijundaaru mun
mokobaabhebhen hino janga jaara bhe deyyhataa.

Iwtoowo iidi wanaa dhatal ka o yaari dhon
hootirta; dhun no yidhaa ka defte no hollitaa.

Monibee no hiwroo sibbhe mun esiraabhe mun
tuma iidi iwtaa dammi hirsaa senditaa.


Wallafuyee Thierno Abdourahmane Bah


ALT NAME

Thierno Abdourahmane Bah