Bismillaahi rahmaani rahiimi. 
Allaahumma salli alaa Muhammadin wa sallim.

Yetteede Maadha yo Joomiraadho Mo waasataa
yaa tagudho leydi e kammu Waawdho Mo ronkataa

Jul fodde huunde ko mofti gandal maa genal
e Nulaadho Maadha e yimbhe makko ko hattataa

Eeh julbhe! jentee dankodhon ko yamirtedhon
koni hey ko lekki, mo nyawndorii ki o ninsataa

Dhiwtee finee tuma hejjugol tijjaa nafay
andee ko en saataabhe thaate dhe tultataa.

Adunaaru nduu dhaynirndu en, beldiiji mun
anden no jilli e tooke, tooke mo lellataa

Ko ndu neebhi woo ko wa fodde kinyhu haray tayhii;
faalaadho hedde mbeleendi mayru o gaynataa

Allaahu yeetike en ndu naatay yiite kayru
e yimbhe mayru e yibbhe mayru: bhe seedataa

Allaahu hollii en e mayru ko yilta en
gaye mayru dhun Ie ko gilli mayru dhi hattataa

Faalaadho sunnu mo lannataa tuma maayi non
ukkee e yiite, yo jokku aduna o tultataa

Koni sukkitee ndu adaade mayde: si mayde hewtii
wippitay kala sukkinoodho ndu atthita

Kala yiudho jawdi no wuddhitii e mu'un yo hul
sabu yiudho mboddi no jokki dhun on wewlataa

Anden no jawdi e jaahu heddho dhu'un wonii
e nawaare mawnde nde fongo muudhun nyiibhataa

Anden no juldho e hedde aduna ko harmudhun
e danyoobhe aljannaaji laakhira, sottataa

Sabu tulde laakhara nden, Nulaadho me'en wi'ii
yhewate nde dey ko wonaa mo dongal tongataa!

Kala heddho abbere nyande darngal landete
gaye lasli mayre e hagghee mayre, o deyyhataa

Kala nedho heddho halal o totti ko Allah farli
e makko fow haye gooto majji o fukkataa

Tuma landitaa si yariino lakkere makko dhon
thappandhe jeedhidhi mawdhi dhondhudhi lannataa

Maakii Nulaadho ko bhurbhe dhuudhude jawdi gaa
bhuri fandhireede ga saare luttal: sottataa!

Fillaama gorko ariino faade ka Annabiijo
(yo Allah juulu e makko hisna ko hattataa)

O torii mo yo o toro Allah rokku mojawdi buy:
si o okka ndin, haggheeji mayri o fukkataa!

Nulaadho maaki : « enee Ie min a yi'ii lilan:
mi jogaaki jawdi wonaa Ie wonude mi tottataa »

On gorko inni yo bhurdho on toro Allah tun
o torii yo jooman rokku o'o ko o dhabhhata.  

Nde o okkanoo ko o dhabbhunoo, bhurnaadho on
nuli nangugol haggheeji jawdi dhi tultataa

O salii bhe jonnude; woo dhu'un ko sagalle doo
ko o soomunoo kon feenyi dhon ka o sikkataa

On gorko ninsi o addi hagghee jawdi ndin
ka Nulaadho Allah, o inni: « nangu mi wattataa!

Jibriilu maaki yo bhurdho ruttu ka makko ton;
jabhataake hankadi bhaawo kanko o hunnataa.

Allaahu watti mo naafighiijo o maydi hen.
Koni jawdi ndi'i ko su'un, bhadiidho ndi wewlataa!

Yo hedhiibhe hey hulanee salaaji mo'on ko hul
mi e lette yeddubhe Allah, lette dhe tultataa

Wata on yidhee adunaaru ndu'u, ko ndu maamahun;
fewtee e laakhara, suudu nyoddi ndu lannataa!

Anden no yiddho ndu woo no ayri e joomi en
yeru fodde giggol mayru, hay si dhuudhata

Ko ndu bhiddho Ibliisal laiini! Mo yhetti bhi
Ibliisa dey hawray najii ko o najitataa.

Wondiidho wondi e yimbhe mayru, kabiima dey
ko ndu jiibe kayru, dawaadhi mayru no duppita

Bhattiidho jiibe dawaadhi makko no nhuura dhon
hisataa, wonaa fii non bhadiidho no nhappita

Faalaadho maahdi e hoore diide bhaleeje kis
hyawataa, wonaa fii gayn andu mi wersataa.

Darjaaji saare malal e gaydhe saiiri fow
ko on on fodaa dhun fow, mo bee wa ko huuwata.

En yeddataano Ie jon dhu'un ka nabhirdho dhun
Mo alaa hadhoowo ko huuwi, Lamdho Mo toonyataa

Wallafuyee Thierno Aliu Bhuubha N'Diyan

---