Bismillaahi 'rahmaani 'rahiimi. 
Allaahumma salli alaa Muhammadin wa sallim.

Hulen Ilaahiya, yetten Mo,     

Yidhen Muhammadu man ten Mo,

Rewen e sunnadji jokken Mo,

Yidhen mo, bhanten mo, watthen Mo,

Fariijo Ahmadu Mahmudu,

 

Nuladho Allahu mantay mi,

E makko juulay mi hisinay mi,

Sabu ko kanko hisintan mi

Tefoowo jom faabo hoolor mi

Ko an yo Annabi Mahmuudu.

 

Danyeede makko wadhi mande!

Yiama dhon huunde haawande,

Mu'ujiza wontandho en maande

Danyeede on ittudho fenaande

E mofte Annabi Mahmuudu!

 

Nde yiite Faarisa ngen roetthi,

Hubheere Kisra yeyhi fetthii

Nde djemma on jalbi haa deyyhi,

Nde koode dhen salmini dhe huntyi

Wiaadho Annabi Mahmuudu,

 

Mo duule dhowdini tuma naange

Mo gibla mu'un woni funnaange,

Mo nuuru mu'un hewti hirnaange

Mo yeeso mu'un jalbiri wa naange

Nulaadho Ahmadu Mahmuudu!

 

Mo bhernde mu'n seekiraa hikmu

Nde ittana hasadu e wahmu;

Nde hebbina nuuru wal fahmu,

E liimanaaku e kala ilmu,

Si feenyi Annabi Mahmuudu

Wallafuyee Thierno Abdourahmane

Thaagel Boori le 5 Fevrier 1963

---

---