Korka | Lailat Al-Qadr
.jpg)
Lailat Al-Qadr
Jemma gōto dolnuɗo e jemmāji sakkitorɗi lewru Sūmayē no wiē Lailat al-Qadr (Jamma Darja). Jemma tedduɗo
mawɗo e Dīna Lislām. Ko e ō jemma Lailat al-Qadr āyēje arane Al-Ghur'āna on jippinā hā e Nulāɗo Muhammad
(صلى الله عليه وسلم) . Jemma mo Jōmirāwo jābinta duā torīɗomo, jemma mo Jōmirāwo yarlotō torīɗomo yarlayē, jemma
yurmēnde wonande julɓe hōrōɓe lewru Sūmayē . Ō Lailat al-Qadr no yewtā e nokkēli ɗiɗi e nder Al-Ghur'āna on. Ndē
inde Lailat al-Qadr no yaltiti lābi tati e nder thortewol Qadr 97:
إِنَّا أَنزَلْنَاهُ فِي لَيْلَةِ الْقَدْرِ
<<Menen Allāhu e mangu Amen, Men jippinī ndē Al-Ghur'ānāre e jemma darja.>> 97:1
وَمَا أَدْرَاكَ مَا لَيْلَةُ الْقَدْرِ
<<Ko honɗun andimmā {yo Muhammadu} ko wietē jemma darja?>>97:2
لَيْلَةُ الْقَدْرِ خَيْرٌ مِّنْ أَلْفِ شَهْرٍ
<<Jemma darja, no ɓuri moƴƴude e wulūre lewru ndu Laitat Al-Qadr alā e mūɗun.>>97:3
تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ
<<Malāika no jippō e wondude e fittāndu senīɗo {Rūhu Holnīɗo} e duŋayē Jōma maɓɓe {e yamaruyē makko} e kala fiyāke.>>97:4
سَلَامٌ هِيَ حَتَّىٰ مَطْلَعِ الْفَجْرِ
<<{Malāika en} Ko ɓe salminayɓe hā ka fērugol fajri.>>97:5
Ɗē āyēje ɗō fow no holli wondema sikke alā Al-Ghur'āna on ko e nder ō jemma jippinā. Ō jemma Lailat al-Qadr no
innē kadi jemma barkināɗo sabu ko e nder makko sōmī ɓundu Dīna Lislāmu, ko e nder makko kadi woni fiyāke
(amr) hēwuɗo gandal e ŋāwōre. Jōmirāwo no dāli e nder thorewol Ad-Dukhan, 44:
إِنَّا أَنزَلْنَاهُ فِي لَيْلَةٍ مُّبَارَكَةٍۚ إِنَّا كُنَّا مُنذِرِينَ
<<Menen Allāhu e mangu Amen, Men jippinī ndē {Al-Ghur'ānāre} e jemma barkināɗo {Lailat al-Qadr}, Menen Men
lātike ko Men hulɓinirayɓe'nde {yedduɗo}.>>44:3
Ō jemma Lailat al-Qadr, ko wornintingol jippagol Al-Ghur'āna on. Ɗī jemmāji sāppo sakkitorɗi lewru Sūmayē, ko
jemmāji dūmagol e rewgol Allah, wurnintinira jemma on jangugol Al-Ghur'āna e jūlugol. Hadīsēji buy no holli
wondema kala julɗo no hāni ɗaɓɓitude ō jemma e nder balɗe sappo sakkitorɗe lewru Sūmayē, mā balɗe jēɗiɗi
sakkitorɗe lewru'ndun.
Ibn 'Umar no māki: Woɓɓe e Sahābāɓe Nulāɗo ɓen hollano e koyɗol wondema Jemma Lailat al-Qadr ko e nder
jemmāji jēɗiɗi sakkitorɗi lewru Sūmayē. Nulāɗo Muhammad (صلى الله عليه وسلم) māki, “No wai wasi koyɗi mōɗon ɗin no
fottani wonde (Jemma Lailat al-Qdr) ko e nder jemmāji jēɗiɗi sakkitorɗiɗin, awa kala fālāɗo ɗaɓɓitude mo (Jemma
Lailat al-Qadr), yo o ɗaɓɓitumo e nder ɗin jemmāji jēɗiɗi sakkitorɗi.” Sahih Bukhari Volume 3, B32, Number 232
‘Ā’ishah bint Abī Bakr no māki: Nulāɗo Allah on no māki, “Ɗaɓɓitē Lailat al-Qadr (Jemma Darja) e nder jemmaji
sappo sakkitorɗi lewru Sūmayē.” Sahih Bukhari Volume 3, B32, Number 234
‘Ā’ishah bint Abī Bakr no māki: “Ka fuɗɗorde balɗe sappo sakkitorɗe lewru Sūmayē, Nulāɗo daditotono kēthi makko
(wakkilō ) jūla jemma on pētu, ɓe immina ɓeyngūre mabɓe fī jūlugol.” Sahih Bukhari Volume 3, B32, Number 241.
E immorde ɗē āyēje Allah e mākūji Nulādho e yewrēji Sahābāɓe makko, julɗo fow no hāni wakkilāde wurnintina
Jemma Lailat al-Qadr e nder balɗe sappo sakkitorɗe lewru Sūmayē hara welsindāki e jangugol Al-Ghur’āna, jūla
torō Allah. Ko ɗun si Thierno Alīyyul Labawī no māki e gimɗi maɓɓe fī jangugol Al-Ghur'āna, ɓe māki: "Koni
wakkilē fī mayre sōbē munŋoɗon yangīji mayre ɗalon salāre e āmugol, Shaytāne adday nganto mayre ko sātoron,
gaŋo lāwō fī himo andi gando daɗay jumal, himo andi janguɗo kan hisay hisnay daɗay, janfāji makko mo jokkiɗun'le
ko halkagol..."
